Nyuma y’uko akuwe ku kibuga ikubagahu nyuma yo kugongana n’umukinnyi wa Gasogi United, myugariro wa Rayon Sports, Muvandimwe JMV arimo kugenda yoroherwa.

Ku munsi w’ejo hashize ubwo Rayon Sports yari yakiriye ikanatsinda Gasogi United 1-0 mu mukino w’umunsi wa 15, myugariro wayo wo ku ruhande rw’ibumoso, Muvandimwe JMV yaje kugira ikibazo cy’imvune ahita asimburwa.

Muvandimwe JMV yavuye mu kibuga hakiri kare ku munota wa 9, ni nyuma yo kugongana n’umukinnyi wa Gasogi United, yahise asimburwa na Mujyanama Fidele.

Yahise ashyirwa mu mbangukiragutabara (Ambulance) ahita ajyanwa kwa muganga.

Yahise ajyanwa muri CHUK aho yahise ashyirwa muri ’Emergency’, yagize ikibazo ku zuru aho yakomeretse ndetse n’igufwa ry’izuru ryagize ikibazo.

Nk’uko ISIMBI ibikesha umuganga wa Rayon Sports, Mugemana Charles ni uko uyu mukinnyi yitaweho, arapfukwa ndetse akaba ameze neza ndetse nta gihindutse akaba ashobora gusezererwa uyu munsi agataha.

Ku kijyanye n’igihe ashobora kumara hanze, yavuze ko ari hagati y’ibyumweru 3 n’ukwezi.

Muvandimwe JMV yagize ikibazo ahita yihutanwa kwa muganga

)