Umunsi wa 28 wasize Haringingo Francis abonye amanota atatu ya mbere muri Rayon Sports, ni mu gihe Al Merrikh SC yihimuye kuri Bugesera FC.

Umutoza wa Bugesera FC, Banamwana Camarade yashakaga gutsinda Al Merrikh SC ngo akomeze ashyire igitutu ku makipe amuri imbere.

Darko Novic na we wari wakiriye uyu mukino kuri Kigali Pelé Stadium kuri iki Cyumweru tariki ya 26 Mata 2026, yari afite umujinya ashaka kwihorera kuko umukino ubanza yamutsinze 1-0.

Bitandukanye n’imikinire y’uyu mutoza uzwiho kugarira cyane, uyu munsi yashakaga gutsinda, yari yafunguye.

Ibi byatumye mu gice cya mbere abona amahirwe atandukanye nk’aho abakinnyi barimo Chikumbutso Salima na Feno Hasina amahirwe babonye umunyezamu Dauda Bareli Ibrahima wa Bugesera FC yabyitwayemo neza.

Uku gusatira kwa Al Merrikh, byaje kubaha igitego ku munota wa 2 w’inyongera ku minota 45, cyatsinzwe na Fenohasina Gilles Razafimaro n’umutwe.

Bugesera FC itari yibonye mu gice cya mbere cyane ko nta n’amahirwe afatika yaremye uretse umupira wa Clement John umunyezamu yakuyemo, Fenohasina Gilles Razafimaro yaje kubatsinda igitego cya kabiri ku munota wa 52.

Nubwo yari Al Merrikh yafunguye ikina, ntabwo byoroheye Bugesera FC nubwo yanyuzagamo igakubagana nk’aho umunyezamu ku munota wa 61 yakuyemo umupira ukomeye wa Byishimo Valua, umunyezamu Garas kandi yongera gukuramo umupira wa Akpeseri Naibe.

Al Merrikh nubwo yari ifite ibitego bibiri, yakomeje gushaka n’ibindi bitego ariko umunyezamu Dauda Bareli Ibrahima akomeza kwihagararaho.

Yakuyemo imipira ikomeye ya Nicolas Randriamanampisoa, Mohamed Gbane na Chikumbutso Salima.

Nubwo muri rusange yari yitwaye neza, Dauda Bareli yaje gukora ikosa ku munota wa kabiri w’inyongera ku minota 90 aho yashatse gucenga maze Fenohasina Gilles Razafimaro arawumwaka ahita atsinda igitego cya gatatu. Umukino warangiye ari 3-0.

Undi mukino wabaye uyu munsi, Haringingo Francis na Rayon Sports bari mu Magepfo aho bari basuye ikipe y’Amagaju FC.

Baje kwitwara neza batsinda ibitego bibiri ku busa bya Tambwe Gloire na Youssou Diagne, Haringingo Francis abona amanota atatu ye ya mbere muri Shampiyona atoza Rayon Sports binamufasha kwisubiza umwanya wa 4.

Nyuma y’umunsi wa 28, Al Hilal SC iyoboye urutonde rwa BK Pro League n’amanota 61, APR FC 55, Al Merrikh SC 52, Rayon Sports ifite 47.

Rayon Sports yatsinze Amagaju FC

Youssou Diagne yatsindiye Rayon Sports igitego cya kabiri

Al Merrikh SC yihimuye kuri Bugesera FC

)