Iradukunda Liliane waserukiye u Rwanda muri Miss World yiyerekanye mu ikanzu yambaye irushanwa rigitangira, byari mu birori by’iserukiramuco mpuzamahanga kuri uyu wa Gatandatu tariki ya 24 Ugushyingo 2018.

Iradukunda agiye kumara ukwezi i Sanya mu Bushinwa ahari kubera irushanwa rya Nyampinga w’Isi 2018.

Abakobwa bose bahataniye ikamba rya Miss World, biyerekanye mu gufungura ku mugaragaro iserukiramuco Hainan International Tourism mu birori byabereye ku kirwa cya Hainan kiri mu majyepfo ya Sanya.

Ubuyobozi bwa Miss World bwasohoye inkuru ivuga ko muri ibi birori buri mukobwa yahisemo umwambaro udasanzwe ‘wamufashije kwerekana umuco n’imyambarire by’igihugu cye’.

Miss Iradukunda Liliane na we uvuga ko yiyeguriye ibyerekeye ubukerarugendo, yambaye ikanzu yiyerekanyemo tariki ya 10 Ugushyingo mu cyiciro cyatangije irushanwa cyo kwambara mu buryo bwa gakondo.

Iyi kanzu yayidodesheje mu buryo buyiha ishusho y’ishabure zambarwaga mu myaka yo hambere mu Rwanda.

Muri ibi birori, abakobwa biyerekanye barangajwe imbere na Manushi Chhillar usanzwe afite ikamba rya Nyampinga w’isi. Uyu we yari yambaye ikanzu yadodewe n’umuhanzi w’imyambaro witwa Falgoni Shane Peacock ari na we wamwambitse atorwa.

Iyi kanzu Miss Iradukunda ayambaye bwa kabiri muri iri rushanwa

Aba bakobwa bose hamwe na Miss World Manushi Chhillar biyerekanye babyina, buri wese mu mujyo wisanisha n’imbyino y’igihugu cye. Abitabiriye iri serukiramuco bishimiye cyane kubona aba bakobwa amaso ku maso.

Hainan International Tourism Island Carnival imaze imyaka 19 iba, igamije gufasha ubushinwa kwerekana ibiba bigezweho mu bukerarugendo, kubumenyekanisha no kwerekana ibintu bishya abantu basura.

Uyu muhango wabanjirijwe no gutembera mu ngoro ndangamateka y’ikipe ya FC Barcelona yubatswe muri Haikou.

Iyi kanzu Iradukunda yayambaye mu birori gakondo bya mbere

)