ISIMBI.RW

Urakunzwe birenze igipimo - Ishimwe Clement abwira Knowless

Our Reporter — 2026-10-01T15:05:57Z

Ishimwe Clement yifurije isabukuru nziza umugore we Butera Knowless mu magambo yuje imitoma, amwibutsa ko amukunda.

Buri tariki ya 1 Ukwakira, umuhanzikazi nyarwanda, Butera Knowless yizihiza umunsi yaboneyeho izuba (umunsi yavukiye).

Gusa, imyaka ibaye umunani ayizihiza ari kumwe n'amahitamo y'ubuzima bwe, Ishimwe Clement aho ubu banafitanye abana babiri.

Abinyujije ku mbuga nkoranyambaga ze, Ishimwe Clement yifurije umugore we isabukuru nziza amubwira ko akunzwe birenze igipimo.

Ati "Isabukuru nziza rukundo rwanjye. Urakunzwe birenze igipimo ndashimira uburyo uri umugore mwiza n'umubyeyi uri we."

"Uyu mwaka uzaguhe urukundo rudashira, ibyishimo n'umugisha. Imana ikomeze kukurinda inakwibutse ko uri umukobwa wayo ikunda. Abakobwa (abana babo) nanjye turagukunda cyane."

Muri Kanama 2016 nibwo Butera Knowless na Ishimwe Clement bakoze ubukwe, ubu bakaba bamaze kubyarana abana babiri b'abakobwa.

Ishimwe Clement yifurije umugore we isabukuru nziza

APR yongereye amasezerano babiri, isinyisha batatu

Canisius Kagabo — 2026-10-01T11:43:37Z

APR BBC yamaze kongera amasezerano abakinnyi bayo babiri Craig Randal II na Teafal Lenar Jr mu gihe yanasinyishije abandi batatu.

Iyi kipe yatwaye Shampiyona ya Basketball iheruka ya 2026, yasanze igomba kongera imbaraga kugira ngo umwaka utaha izabe ikomeye kurushaho.

APR BBC yahisemo guhera ku bakinnyi bayo beza ibagumana, yongerera Craig Randal ukina nka 'Point Guard' amasezerano y'imyaka ibiri. Craig ni we wabaye umukinnyi mwiza w'imikino ya kamarampaka (MVP).

Yahise kandi inongerera amasezerano umukinnyi wayo ushobora gukina nka 'Small cyangwa Power Forward', Teafale Lenard Jr. Aba bombi ni abakinnyi bagize uruhare rukomeye mu mwaka w'imikino wa APR BBC urangiye wo yatwayemo igikombe.

Ntibyarangiriye aho kuko yanatangiye kwiyubaka yagiye muri RSSB Tigers BBC ikuramo Antino Alverazes Jackson wahoze akinira APR BBC.

APR BBC yanagiye muri Patriots BBC ikuramo abakinnyi babiri bayo beza bitwaye neza mu mwaka w'imikino ushize.

Yahereye Chingka Kennedy Garba wabaye umukinnyi mwiza w'umwaka usanzwe wa Shampiyona hatarimo imikino ya kamarampaka.

Yanasinyishije kandi Hubert Sage Kwizera na we wakiniraga Patriots BBC wegukanye igihembo cy'umukinnyi wazamuye urwego kurusha abandi.

Craig Randal II yongereye amasezerano

Lenard Jr yongereye amasezerano muri APR BBC

Hubert Sage ni umukinnyi wa APR BBC

Antino Alverazes Jackson yagarutse murj APR BBC

Kennedy Garba ni umukinnyi mushya wa APR BBC

Umukinnyi wa APR mu ikipe nziza ya 'FIBA Intercontinental Cup 2026'

Canisius Kagabo — 2026-10-01T10:14:25Z

Randall Craig usanzwe ari umukinnyi wa APR BBC akaba yarakiniye RSSB Tigers BBC muri 'FIBA Intercontinental Cup 2026', yashyizwe mu ikipe nziza y'iri rushanwa.

Nyuma yo kuba ikipe ya mbere muri Afurika yegukanye BAL 2026, RSSB Tigers yahagarariye Afurika mu irushanwa rya 'FIBA Intercontinental Cup 2026' ryabereye mu Bushinwa mu kwezi gushize.

Mu bakinnyi RSSB Tigers BBC yifashishije harimo abo yakuye muri APR BBC barimo na Leonard Craig Randall waje kugira irushanwa ryiza.

Impuzamashyirahamwe y'umukino wa Basketball ku Isi (FIBA), yamutoranyije mu ikipe y'iri rushanwa kumwe na Eric Dixon ukinira G-League wabaye umukinnyi mwiza mu irushanwa ryose (MVP), Lester Quinones wa G-League, Francisco Caffaro wa Boca Junior na Jay Bruhnke wa Rytas Vilnius.

Craig yakinnye iminota 113, atsindamo amanota 77, bivuze ko yatsindaga amanota 25,7 kuri buri mukino muri iri rushanwa ushyize ku mpuzandengo.

Craig Randall akaba yamaze kongera amasezerano y'imyaka ibiri akinira APR BBC baheruka gutwarana igikombe cya Shampiyona y'icyiciro cya mbere muri Basketball mu Rwanda.

Craig Randall ari mu ikipe y'irushanwa

Ikipe y'irushanwa

Bruce Melodie yakuyeho urujijo

Our Reporter — 2026-10-01T08:47:16Z

Umuhanzi Itahiwacu Bruce wamamaye nka Bruce Melodie, yakuyeho urujijo ku ndirimbo ye Irya 4 by'umwihariko aho aririmba itegeko rya mbere n'irya kabiri.

Nyuma y'uko asohoye indirimbo Irya 4, aho iryo rya kane ari itegeko mu mategeko 10 agize iyi ndirimbo, benshi bayigiye bayisesengura uko babishaka, bamwe bavuga ko ari nziza abandi kabavuga ko nta kintu kirimo.

Kimwe mu byagarutsweho cyane ni itegeko rya mbere n'irya kabiri aho aririmba ati "irya mbere iga kwigira bazanga, bitari ibyo natwe tuzakwanga. Irya kabiri iga kwigirira ibanga, burya na mukeba yakwatsa."

Melodie abinyujije ku mbuga nkoranyambaga ze, yakuyeho urujijo ko itegeko rya mbere ritareba inzanga kimwe n'uko irya kabiri ritareba injajwa kuko nta muntu wakwigira icyo ari cyo.

Ati "Itegeko rya mbere ntabwo rireba inzanga. Ntabwo wasaba umuntu usanzwe uri bazanga kwiga kwigira inzaga."

"Itegeko rya kabiri ntabwo rireba injajwa, ntabwo wasaba injajwa kugira ibanga."

Irya 4 imaze iminsi itanu isohotse, imaze kurebwa n'abantu barenga miliyoni ku rubuga rwa YouTube.

Bruce Melodie yakuyeho urujijo ku ndirimbo ye

Umunyamakuru Divin Uwayo wa RBA yambitse impeta umukunzi we

Our Reporter — 2026-10-01T07:25:46Z

Umunyamakuru akaba n'Umuyobozi wa Radio z'Abaturage z'Ikigo cy'Igihugu cy'Itangazamakuru (RBA), Divin Uwayo, yambitse impeta umukunzi we bitegura kurushingana, Toni Ellen.

Abinyujije ku mbuga nkoranyambaga ze muri iki gitondo cyo ku wa 1 Ukwakira 2026, Divin Uwayo yashyizeho amafoto ye amaze kwambika impeta y'urudashira Toni.

Mu butumwa bwaherekeje aya mafoto, Divin Uwayo yagize ati “Uyu munsi twahisemo ubuziraherezo. Roho ebyiri, isezerano rimwe, urugendo rw'ubuzireherezo ruratangiye."

Divin Uwayo yambitse umukunzi we impeta ya fiançailles nyuma y'igihe bakundana ndetse bari mu myiteguro yo gukora ubukwe.

Divin Uwayo ni umuyobozi wa Radio z'Abaturage za RBA kuva mu Gushyingo 2024, ni nyuma y'imyaka ari umunyamakuru utara inkuru muri iki kigo cy'Igihugu cy'Itangazamakuru.

Divin Uwayo yambitse umukunzi we impeta ya fiançailles

Toni Ellen umukunzi wa Divin Uwayo

Cristiano Ronaldo yivumbuye ava mu ikipe y'igihugu

Our Reporter — 2026-09-30T21:11:25Z

Kapiteni w'ikipe y'igihugu ya Portugal, Cristiano Ronaldo yavuye mu mwiherero w'ikipe y'igihugu ya Portugal, nyuma yo kutumvikana n'umutoza.

Ronaldo usanzwe ukinira Al Nassr muri Saudi Arabia, yavuye muri uyu mwiherero nyuma y'uko ku mukino wa Norway yicaye iminota 90 ndetse no kuri Denmark ejo yagombaga kuzicara nk'uko umutoza Jorge Jesus yari yabitangaje mu kiganiro n'itangazamakuru.

Abinyujije ku mbuga nkoranyambaga ze, Cristiano Ronaldo yemeje ko nyuma yo kuganira na perezida w'ishyirahamwe ry'umupira w'amaguru muri Portugal, yafashe umwanzuro wo kuva mu mwiherero ibindi akazabivuga nyuma.

Ati "Nyuma y'ikiganiro n'itangazamakuru na nyuma y'ikiganiro nagiranye na perezida w'ishyirahamwe ry'umupira w'amaguru muri Portugal, nafashe umwanzuro wo kuva mu mwiherero. "

"Igihe nikigera nzabwira abanya-Portugal bose icyanteye imbaraga zo kuva mu ikipe y'igihugu nahoze nkunda. Ubu ni igihe cyo kwifuriza amahirwe masa Portugal n'abakinnyi bagenzi banjye."

Hari hashize icyumweru, Cristiano Ronaldo atangaje ko igihe azabona ntacyo arimo afasha mu kibuga adatsinda ibitego, abona adakenewe, abona ashobora guteza ikibazo azahita azinga ibikapu akava mu ikipe y'igihugu.

Cristiano Ronaldo yavuye mu mwiherero w'ikipe y'igihugu

Amavubi yanyagiye Sudani (AMAFOTO)

Our Reporter — 2026-09-30T19:07:40Z

Ikipe y'Igihugu y'u Rwanda y'abatarengeje imyaka 23, yanyagiye Sudani ibitego 3-0 mu gushaka itike y'Igikombe cya Afurika.

Kuri uyu wa Gatatu nibwo u Rwanda rwatangiye urugendo rwo gushaka itike y'Igikombe cya Afurika cy'abatarengeje imyaka 23 kizabera mu Misiri umwaka utaha.

Amavubi y'u Rwanda yari yakiriye Sudani mu mukino wabereye kuri Kigali Pelé Stadium kuri uyu wa Gatatu tariki ya 30 Nzeri 2026, mu mukino waboroheye cyane.

Hakiri kare ku munota wa 10, Niyigena Abdul usanzwe ukinira Etoile del'Est, yafunguye amazamu n'umutwe.

Muri iki gice cya mbere, u Rwanda ruba rwabonye ibitego byinshi ariko ntibabasha kubyaza umusaruro amahirwe babonye nk'umupira wa Shingiro Honore umunyezamu yakuyemo, kufura ya Sindi Paul Jesus yakubise igiti cy'izamu n'andi.

Amavubi yatangiranye imabaraga igice cya kabiri maze Shingiro Honore atsinda igitego cya kabiri ku munota wa 47, hari mbere y'uko Sindi Paul Jesus atsinda agashinguracumu ku munota wa 78. Umukino warangiye ari 3-0.

Umukino wo kwishyura ukaba uteganyijwe kuzaba ku wa Kabiri w'icyumweru gitaha tariki ya 6 Ukwakira, ikipe izakomeza izahura na Cameroun mu kindi cyiciro.

Ni umukino u Rwanda rwarushije Sudani cyane

Niyigena Abdul wafunguye amazamu

Bishimira igitego cya Sindi Paul Jesus

Stephen Constantine umucunguzi waje mu bye ariko batamwemera? Ahabwe indabo ze!

Canisius Kagabo — 2026-09-30T11:53:24Z

Uko tunenga ibitagenda, tujye tunafata umwanya dushime abitwaye neza, umutoza w'ikipe y'igihugu, Stephen Constantine akwiye gushimwa, ahabwe indabo ze, amanota yose kuko nubwo hari abatangiye batemera imikinire ye ubu nta ruvugiro.

Ubu uyu mutoza w'imyaka 63 w'Umuhinde wavukiye mu Bwongereza, yego n'ubuze icyo asebya inka aravuga ati “Dore icebe ryayo”, gusa muri aka kanya biragoye ko wamubonaho inenge, n'iyo yaba ihari yaba ari ya ntuza y'uwo ukunda ubonamo amaribori.

Iyi nkuru se nyihere muri 2014? Ariko mureke nyihere muri Werurwe 2026 ubwo Stephen Constantine yongeraga kugirwa umutoza w'ikipe y'igihugu Amavubi. Ntabwo byatinze kujya mu kwezi kwa buki n'Abanyarwanda kuko yahise atwara irushanwa rya FIFA Series yabereye mu Rwanda.

Bamwe ntabwo babihaye agaciro kuko bavugaga ko ari imikino ya gicuti kandi bakinnye n'ibihugu bidakomeye.

Yatangiye gutegwa imikino yo gushaka itike y'igikombe cya Afurika cya 2027 aho u Rwanda rwahereye kuri Liberia tariki ya 25 Nzeri 2026 i Kigali, aho mbere y'uyu mukino abantu bose bahurizaga ku kuba nta gisobanuro yari kubona aramutse atsinzwe nayo.

Byaje kurangira Amavubi atsinze 3-1. Nubwo yatsinze ntabwo benshi bamwemeye aho bavugaga yakinnye nabi kuko Liberia yamurushije ndetse imikinire ye itanyuze benshi.

Urugamba rwari rukurikiyeho ni umukino wo mu itsinda K w'umunsi wa kabiri mu gushaka itike y'Igikombe cya Afurika cya 2027 aho rwasuye Cape Verde.

Uyu mukino wabereye muri Cape Verde ejo hashize ku wa Kabiri, nta muntu wakekaga ko yajya gutsindira Cape Verde iwayo aho bavugaga ko icyo yakora gikomeye ari ukunganya nayo.

Stephen Constantine yaje gucecekesha buri wese atsindira Cape Verde iwayo ibitego 2-1 binatuma ayobora itsinda K n'amanota 6 kuri 6.

Constantine yahinduye iki mu Mavubi?

Gutsinda imikino ine yikurikiranya, ntabwo ari impanuka ahubwo ni ibintu biba byateguwe cyane ndetse n'abakinnyi bakumva umutoza.

Ni umutoza waje agarura gahunda yo gukina sisiteme ya 4-4-2, abantu batabyumvaga kuko hari bamwe bafata nk'abeza bigaragara ko bashobora kutazigera bibona muri iyi mikinire nka Hakim Sahabo na Samuel Gueulette kuko iyi mikinire nta nimero 10 aba akeneye mu kibuga.

Iyo urebye ibitego Constantine atsinda kuva muri FIFA Series kugeza muri iyi mikino yo gushaka itike y'Igikombe cya Afurika, ibitego atsinda biba ari bimwe, byateguwe mu buryo busa kandi bigatanga umusaruro.

Ikindi kintu gikomeye ni umutoza wirinda guhindura ikipe ye itsinda kuko 11 yabanjemo muri FIFA Series nibo yabanjemo ku mukino wa Liberia, kuri Cape Verde ahinduramo Jojea azana Mugisha Gilbert, ni ikipe imaze kumenyerana kandi bumva ibyo umutoza ababwira. Iki ni kimwe mu bifasha Constantine.

Iyo uteye icyumvirizo, bakubwira ko ari umutoza ugira igitsure ariko na none wumva abakinnyi be, wubatse umubano ukomeye n'abakinnyi ku buryo bamufata nk'umubyeyi. Yagaruye abakinnyi basaga n'abaciwe mu ikipe y'igihugu kandi babanye neza n'abandi nka Samuel Gueulette, Hakim Sahabo nubwo atahamagawe ni uko adakina ariko muri FIFA Series yari yaramuhamagaye.

Ibirenze kuri ibi, ubu u Rwanda rufite abakinnyi beza, bakina ku rwego rwiza hari nk'abavandimwe Leroy-Jacques Mickels na Joy-Lance Mickels ubu noneho biyongereweho na Emeran Noam bakina ku rwego rwiza nib o baheruka kwinjira mu Mavubi, basanzemo abandi bakinnyi nabo bakina ku rwego rwiza nka Mutsinzi Ange, Kavita, Mugisha Bonheur, Bizimana Djihad, Kwizera Jojea n'abandi.

Stephen Constantine akaba ari mu nzira zo kongera gukora ibyo yakoze muri 2014 kuko yatoje u Rwanda kuva 2014-2015 aho yari yafashije Amavubi kubona itike y'Igikombe cya Afurika cya 2015 ariko rwaje guhanwa nyuma yo kuregwa gukinisha Daddy Birori wari ufite imyirondoro itandukanye.

Ubwo yatozaga kandi Amavubi nibwo u Rwanda rwigeze kugira umwanya mwiza ku rutonde ngaruka kwezi rwa FIFA aho mu Kuboza 2014 rwabaye urwa 68 ku Isi.

Stephen Constantine impinduka ze mu Mavubi ziragaragara

Amavubi ubu ari mu bihe byiza ibifashijwemo na Stephen Constantine

Umukunzi wa Niyomugabo Claude byamurenze yemera kumena ibanga

Canisius Kagabo — 2026-09-30T07:20:58Z

Umukunzi wa Niyomugabo Claude, Umutoni Nadia nyuma y'uko Amavubi atsinze Cape Verde, yashyize ikiganiro hanze yagiranye n'uwo yihebeye ariko asaba imbabazi kuko abizi ko bitari bikwiye kujya ku karubanda, gusa byose ngo ni ibyishimo.

Ejo hashize, Amavubi yatsindiye Cape Verde iwayo ibitego 2-1 mu mukino w'umunsi wa kabiri mu gushaka itike y'Igikombe cya Afurika cya 2027.

Niyomugabo Claude ni we wafunguye amazamu mu gihe Elie Tatou yaje gutsinda igitego cy'intsinzi.

Umukunzi wa Niyomugabo akaba yashyize ahanze ikiganiro yagiranye n'uyu mukinnyi, hari kuri WhatsApp.

Yamwandikiye ati "waramutse mukunzi? Nizere ko umeze neza chr wanjye. Uyu munsi nkushyize mu biganza by'Imana, ikurinde, witware neza kurusha ubushize kandi utsinde."

Claude yamusubije ati "waramutse rukundo, nizere ko waramutse neza. Ndagukunda. Amen."

Ubu butumwa yashyize hanze, bwaherekejwe n'amagambo avuga ko abizi ko bitari ngombwa kubishyira hanze ariko kubera ibyishimo abikoze.

Ati "Mumbabarire ndabizi ko bidakwiye kuza hano ku karubanda, ni uko nishimye ntimuncire urubanza. Imana ni nziza cyane."

Niyomugabo Claude agize imikino ibiri myiza uwa Liberia na Cape, ni nyuma y'uko benshi bagiye bibaza impamvu yahamagawe kandi nta kipe afite.

Ikiganiro cya Niyomugabo Claude n'umukunzi we mbere y'umukino

Niyomugabo Claude aba ashyigikiwe n'umukunzi we

Byari iby'agaciro gukorera umupira w'qmaguru mu Rwanda - Shema Ngoga Fabrice yeguye

Canisius Kagabo — 2026-09-30T00:24:02Z

Shema Ngoga Fabrice wari umuyobozi w'ishyirahamwe ry'umupira w'amaguru mu Rwanda, yeguye kuri uyu mwanya nyuma y'iminsi mike afunguwe.

Tariki ya ya 22 Nzeri 2026, nibwo Ngoga Fabrice Shema yafunguwe nyuma y'iminsi igera kuri 42 afunzwe akurikiranyweho gutanga sheki itazigamiye no kwihesha ikintu cy'undi hakoreshejwe uburiganya.

Nyuma yo kumvikana n'Ubushinjacyaha, Shema Ngoga Fabrice akaba yaraje kurekurwa aho yakatiwe amezi atandatu asubitswe mu mwaka umwe.

Shema Fabrice, mu gihe benshi bibazaga niba azakomeza kuyobora FERWAFA, yanditse asezera kuri uyu mwanya.

Ibaruwa ya Fabrice asezera

"Ndabamenyesha ko natanze ubwegure bwanjye ku mwanya wa Perezida w'Ishyirahamwe ry'Umupira w'Amaguru mu Rwanda (FERWAFA), bigomba no guhita bikurikizwa."

"Iki cyemezo gikurikiye ikibazo cy'ubunyangamugayo cyagaragajwe gifitanye isano n'ubuzima bwite bwanjye."

Yakomeje avuga ko abona ari icyemezo cyiza kizafasha FERWAFA gukomeza gukora nta kibazo gihari.

Yakomeje agira ati "Nzakomeza gushyigikira amahame y'ubunyangamugayo, gukorera mu mucyo n'imiyoborere myiza mu mupira w'amaguru w'u Rwanda."

"Niteguye kuzafasha mu ihererekanya bubabasha kugira ngo imirimo ya FERWAFA ikomeze neza."

Yashimiye Inteko Rusange yamutoye, Komite Nyobozi, abakozi ba FERWAFA, abafatanyabikorwa, abafana, Ikipe y'Igihugu n'abandi bose bamugiriye icyizere igihe yayoboraga.

Yasoje agira ati "Byari iby'agaciro gukorera umupira w'qmaguru mu Rwanda ."

Muri Kanama 2025 nibwo Shema Ngoga Fabrice yari yatorewe kuyobora FERWAFA mu gihe cy'imaka ine iri imbere.

Mu mwaka umwe amaze, yagize uruhare mu gushaka abakinnyi beza bakina mu mahanga bafasha Ikipe y'Igihugu y'u Rwanda 'Amavubi' no kuyifasha gukorera umwiherero mu Misiri.

Agiye atageze ku ntego ze yifuje zo kujyana Ikipe y'Igihugu mu Gikombe cya Afurika cya 2027, Amavubi aherukamo mu 2004, no kuyageza mu Gikombe cy'Isi cya 2030.

Kugeza ubu FERWAFA iyobowe na Me. Claudine Gasarabwe nka Perezida w'Agateganyo, akaba yari asanzwe ari Visi Perezida wa Mbere ushinzwe Imari n'Ubutegetsi.

Shema Ngoga Fabrice yeguye

Abayobozi mu nzego za leta, abasiporutifu bakeje Amavubi yasasiye Cape Verde

Canisius Kagabo — 2026-09-29T23:40:51Z

Abayobozi barimo Minisitiri wa Siporo, Nelly Mukazayire, Minisitiri w'Ubutegetsi bw'Igihugu, Habimana Dominique n'abandi bashimiye ikipe y'igihugu y'u Rwanda yatsinze Cape Verde mu mukino utari woroshye.

Kuri uyu wa Kabiri tariki 29 Nzeri 2026, Amavubi y'u Rwanda yatsindiye Cape Verde iwayo ibitego 2-1 mu mukino wo gushaka itike y'Igikombe cya Afurika cya 2027.

Ibi byatumye u Rwanda ruyobora itsinda K n'amanota 6/6 runganya na Mali, Liberia na Cape Verde zikagira ubusa.

Nyuma y'uyu mukino abarimo abayobozi mu nzego zitandukanye za Leta, abazwi muri Siporo, bifashishije imbuga nkoranyambaga bagaragaza amarangamutima yabo.

Barangajwe imbere ya Minisitiri wa Siporo Nelly Mukazayire, yagize ati “Mwakoze gukotana, mukagaragaza ko muri bato batari gito. Mukomereze aho, murashoboye kandi murashyigikiwe. Mukomezanye ishyaka, ikinyabupfura no kudateshuka ku ntego.”

Minisitiri w'Ubutegetsi bw'Igihugu, Habimana Dominique, yagize ati “Turi Amavubi. Dushimiye cyane Amavubi yacu ku byishimo bakomeje guha Abanyarwanda. Murashoboye mukomereze aho.”

Minisitiri w'Urubyiruko n'Iterambere ry'Ubuhanzi, Dr. Utumatwishima Abdallah, we yagize ati “Mvugira uti u Rwanda”.

Minisitiri w'Ububanyi n'Amahanga n'Ubutwererane, Amb. Olivier Nduhungirehe, yagize ati “Mwakoze cyane, Amavubi kuri iyi ntsinzi yo hanze kuri Cap-Vert.”

Umunyabigwi mu mupira w'amaguru w'u Rwanda, Niyonzima Haruna, yagize ati “Wakoze cyane gihugu cyanjye, ntewe ishema namwe basore.”

AMAVUBI🔥🔥🇷🇼
Mwakoze gukotana mukagaragaza ko muri bato batari gito 💪🏾
Mukomereze aho, murashoboye kandi murashyigikiwe. Mukomezanye ishyaka, ikinyabupfura no kudateshuka ku ntego #AFCON2027 maze u Rwanda Rweme! #TuriAmavubi https://t.co/JsJ1XLrHPF

— Nelly Mukazayire (@nmukazayire) September 29, 2026

Turi #Amavubi

Dushimiye cyane #Amavubi yacu ku byishimo bakomeje guha Abanyarwanda.

Murashoboye mukomereze aho. 👏👏 pic.twitter.com/ETBibVBJG0

— Dominique H (@Dominiquehab) September 29, 2026

Congratulations #Amavubi for this away win against Cabo Verde👏🏾!#TuriAmavubi🇷🇼 https://t.co/lnYNmteVg4

— Olivier J.P. Nduhungirehe (@onduhungirehe) September 29, 2026

Mvugira uti u #Rwanda .
💪❤️ pic.twitter.com/LcNNrszwDD

— UTUMATWISHIMA (@jnabdallah) September 29, 2026

View this post on Instagram

A post shared by Niyonzima Haruna (@niyonzimaharuna)

Amavubi yatsindiye Cape Verde iwayo (AMAFOTO)

Our Reporter — 2026-09-29T18:06:29Z

Ikipe y'Igihugu y'u Rwanda yandikiye amateka muri Cape Verde iyitsinda ibitego 2-1 mu mukino w'umunsi 2 mu gushaka itike y'Igikombe cya Afurika cya 2027.

Abasore ba Stephen Constantine batangiye umukino barushwa cyane na Cape Verde yabonye amahirwe agera kuri 3 mu minota 10 ya mbere harimo ayo ku munota wa 9 aho Tavares yasigaranye n'umunyezamu Ntwari Fiacre ariko akawukuramo.

Amahirwe ya mbere Amavubi yabonye ni ayo ku munota wa 15 aho Niyomugabo Claude yahinduye umupira mwiza imbere y'izamu ariko hakabura umukinnyi ushyira mu izamu.

Cape Verde yaje kubona igitego cya mbere ku munota wa 40 cyatsinzwe na Gilson Tavares ku mupira wari uhinduwe na Mendes.

Amavubi ntabwo yacitse intege yakomeje gushaka igitego ndetse iza kukibona ku ishoti rikomeye rya Niyomugabo Claude.

Hari ku munota wa kabiri w'inyongera, Amavubi yabonye koruneri maze Leroy-Jacques Mickels ayiha Joy-Lance Mickels wahise ayiha Bizimana Djihad wawupashe n'igituza Niyomugabo Claude atera ishoti rikomeye maze umupira uruhukira mu rushundura. Amakipe yombi yagiye kuruhuka ari 1-1.

Amavubi yatangiye igice cya kabiri akora impinduka, Biramahire Abeddy aha umwanya Iradukunda Elie Tatou.

Izi mpinduka zaje gutanga umusaruro ku munota wa 52 ubwo Iradukunda Elie yatsindiraga u Rwanda igitego cya kabiri ku mupira wari uhinduwe na Joy-Lance Mickles.

Ku munota wa 67, Emeran Noam na Kwizera Jojea baje kwinjira mu kibuga hasohoka Leroy-Jacques Mickels na Mugisha Gilbert. Muhire Kevin na Nshuti Innocent baje kujya mu kibuga Mugisha Bonheur na Joy-Lance Mickels bavamo.

Umukino waje kurangira ari 2-1 maze u Rwanda rufata umwanya wa mbere muri iri tsinda rya K n'amanota 6 kuri 6.

Korari Hermon yashyize hanze indirimbo nshya yise ‘Amatunda', ivuga ku rukundo rwa Kristo n'abamwizera

Our Reporter — 2026-09-29T10:22:16Z

Korari Hermon yo muri ADEPR Rubona yashyize hanze indirimbo nshya yise ‘Amatunda', igamije gutambutsa ubutumwa bushingiye ku rukundo ruhebuje rwa Kristo n'abamwizera.

Iyi Korali ivuga ko icyatumye ihitamo iyi ndirimbo ari ukugira ngo itambutse ubutumwa buvuga ku rukundo ruri hagati y'Umukwe, ari we Kristo, n'Umugeni, ari we Torero rya Kristo.

Nyuma yo kumva iyi ndirimbo, Korari Hermon yifuza ko buri wese yazirikana urukundo Imana yakunze abantu kugeza ubwo yatanze Kristo. Ivuga ko umuntu uri muri Kristo Yesu aba anezerewe, ndetse n'iyo ahuye n'ibigeragezo, Kristo amuba hafi, akamutabara kandi akamuha ibyo akeneye.

Korari Hermon ivuga ko umwihariko wa ‘Amatunda' uri mu butumwa bw'urukundo ruhebuje ruri hagati ya Kristo n'Itorero.

Kuva iyi ndirimbo yashyirwa hanze, abantu benshi bayumvise bakayikunda. Korari ivuga ko iyo ijyanye ivugabutumwa, iyi ndirimbo ikunze gusabwa kenshi, ndetse hari aho bayisaba inshuro ebyiri.

Iyo yongeye kuririmbwa, Korari Hermon ivuga ko ikomeza kumvikana nk'aho ari nshya ku bayumva, yaba abakuru n'abato, abo mu madini n'amatorero atandukanye ndetse n'abataramenya Imana.

Ni muri urwo rwego Korari Hermon ifata ‘Amatunda' nk'indirimbo y'ikirango cyayo, ndetse ikaba imwe mu ndirimbo zigaragaza umwihariko wayo.

Igitekerezo cyo guhimba iyi ndirimbo cyaje nyuma yo gusoma Ijambo ry'Imana, cyane cyane amagambo ari mu Ndirimbo ya Salomo.

Umuririmbyi witwa Théopiste, wari usanzwe ahimba zimwe mu ndirimbo Korari Hermon yaririmbaga, ni we wayihimbye nyuma yo gusoma ayo magambo. Yavuze ko yayumviseho ubutumwa bumukora ku mutima, ayoborwa n'Umwuka Wera ahita ahimba indirimbo ‘Amatunda'.

Yayihimbye mu 2004, ayigisha Korari Hermon mu 2005, hanyuma mu 2006 bayijyana muri studio kugira ngo bayifate amajwi.

Ubutumwa bwihariye Korari Hermon ishaka kugeza ku bantu binyuze muri iyi ndirimbo ni uko Yesu ari umukunzi mwiza, kandi abari muri we adatererana.

Korari ivuga ko n'iyo abamwizera bahuye n'ibibazo, Kristo akomeza kuba hafi yabo kandi akababera byose. Abamaze kumenya Yesu Kristo barasabwa gukomeza kuguma muri we, mu gihe abataramumenya basabwa kumwegera bakaba muri we.

Korari Hermon yifuza ko umuntu uzumva ‘Amatunda' yagira impinduka mu mibanire ye n'Imana, akakira Yesu Kristo kandi akamugira Umukunzi we mu buzima bwa buri munsi.

Ishaka ko umuntu amenya ko ibyo akeneye byose ashobora kubitura Kristo, akamubera igisubizo kandi akamuyobora mu rugendo rwe rwose.

Ubutumwa bwa Korari Hermon bushimangira ko kugira Yesu ari inyungu, kutamugira bikaba igihombo, kuko kugira Yesu mu buzima bw'umuntu ari byo bimubera isoko y'ubuzima.

Yatangiye umurimo w'Imana mu 1998, mu cyahoze ari Paruwasi ya Rubona, mu Karere ka Rubavu, aho yakomeje gukoresha impano y'abaririmbyi bayo mu kwamamaza ubutumwa bw'Imana.

Korali Hermon yashyize hanze indirimbo nshya

Byishimo Valua na Niyo David ntabwo bazakina umukino w'Amavubi na Sudani

Canisius Kagabo — 2026-09-29T09:51:51Z

Mu gihe ejo ku wa Gatatu Amavubi y'abatarengeje imyaka 23 azakina na Sudani mu gushaka itike y'Igikombe cya Afurika kizabera mu Misiri umwaka utaha, ntabwo azaba afite abakinnyi babiri yari yahamagaye, Niyo David na Byishimo Valua.

Byishimo Valua usanzwe ukinira Plice FC yo mu Rwanda, ntabwo yitabiriye ubutumire bw'ikipe y'igihugu kubera ko yagize ikibazo cy'uburwayi, n'umukino wo kwishyura ntabwo azawukina.

Niyo David ukinira Veres Rivne mu cyiciro cya mbere muri Ukraine, ntazakina umukino ubanza Amavubi U23 azakinamo na Sudani ejo ku wa Gatatu tariki ya 30 Nzeri 2026 kuri Kigali Pele Stadium kubera ko yabuze visa ndetse biranagoye ko yazakina n'umukino wo kwishyura.

Kubera ibibazo by'intambara ikomeje kubera muri Ukraine, uyu mukinnyi w'Umunyarwanda, Niyo yagombaga kunyura muri Moldova na Bus, akahafatira indege imuzana i Kigali anyuze i Doha.

Hajemo ibibazo kubera ko ikipe ye kuko itarabasha kumubonera Visa imwinjiza muri Moldova ngo ahafatire indege iza i Kigali.

Iki kikaba ari ikibazo ku mutoza Eric Nshimiyimana kuko aba ni bamwe mu bakinnyi umuntu yanafata nk'inkingi za mwamba muri iyi kipe by'umwihariko Niyo David, kubabura bishobora kumwicira imibare.

Niyo David yabuze ibyangombwa

Byishimo Valua ararwaye

Kuki gatanya uko iminsi ishira zigenda ziyongera?

Our Reporter — 2026-09-29T08:32:32Z

Ese musigaye mubona ukuntu ingo hafi ya zose zo muri iyi minsi zirangirira muri gatanya? Umwaka umwe cyangwa ibiri biba bihagije ngo urugo rube rusenyutse.

Ibyatangiranye ibyishimo byinshi, bikarangirana n'ukwicuza kwinshi cyane. Ese kuki ingo z'iki gihe zitakiramba?
Imwe mu mpamvu zibitera ni uko imibereho y'abantu yahindutse. Abagore benshi barize, bafite akazi kandi bafite ubushobozi bwo kwitunga. Ibi bituma umuntu adakomeza kwizirika ku rugo rurimo ihohoterwa cyangwa agasuzuguro kubera ko atagitinya kubura ubufasha bw'amafaranga.

Ikindi ni uko abantu bagira ibyifuzo byinshi ku wo bashakanye. Umuntu aba yiteze ko uwo bashakanye aba umukunzi, inshuti magara, umujyanama ndetse n'umufatanyabikorwa muri byose. Iyo ibyo byifuzo bidahuye n'ukuri k'ubuzima, umubano ushobora gutangira kurangwa no kutumvikana.

Ikindi gitangaje ni ikoranabuhanga. Hari igihe abashakanye baba bicaye hamwe, ariko buri wese ari kuri telefone. Ibi bishobora kugabanya ibiganiro n'ubusabane, bigatuma ibibazo bitavugwa bigenda byiyongera. Kandi iyo icyo twakwita nk'itumanaho (Communication) gisenyutse, n'urukundo rushobora gukurikiraho.

Rero ikibazo si uko urukundo rw'iki gihe rwabuze burundu, ahubwo, imiterere y'urukundo n'ubuzima bw'abashakanye byarahindutse. Urugo rw'iki gihe rukeneye itumanaho, kwihanganirana no gukorana, aho kwishingikiriza gusa ku rukundo rwo mu ntangiriro kuko gukunda umuntu biroroha iyo ibintu byose bimeze neza; ikizamini nyacyo cy'urukundo gitangira iyo ubuzima butangiye kugorana.

Jean François Regis/ ISIMBI.RW}}

Umunsi umugore wa Junior Giti amubwira ko atazigera yahukana, we nashaka azagende

Our Reporter — 2026-09-29T06:29:35Z

Umusobanuzi wa filime, Bugingo Bonny wamamaye nka Junior Giti yavuze ko atazigera yahukana na rimwe ndetse ko n'umugore we Muhoza Angel amubwira ko atazaruvamo.

Ibi yabigarutseho mu kiganiro n'ikinyamakuru ISIMBI aho yagarutse ku mibanire y'umugabo n'umugore.

Ku giti cye, Junior Giti yavuze ko atazigera ava mu rugo kandi ko n'umugore we Angel yamubwiye ko yavuye iwabo avuyeyo.

Ati "Njyewe umugore yarambwiye ngo niba ushaka kugenda uzagende ariko njyewe umunsi umvana iwacu, wanzanye unzanye, waranyizaniye sinzava muri iyi nzu, wowe niwumva urambiwe, uzaruvemo ugende."

Yitanzeho urugero yavuze ko iyo yarakaranyije n'umugore hari n'igihe amuboloka (block) akabanza agatuza kuko yirinda kuba yamubwirana umujinya akabanza agatuza.

Yavuze ko kandi ko ingo nyinshi by'umwihariko iz'ibyamamare ibyo bavugwaho byinshi ku mbuga nkoranyambaga ari bo baba babahaye uruvugiro, abavuga bahera ku byo baba baberetse.

Junior Giti yavuze ko umugore yamubwiye ko atazigera yahukana

Nabuze amahoro - Vozinha witegura gukina n'Amavubi

Our Reporter — 2026-09-28T16:49:25Z

Umunyezamu w'ikipe y'igihugu ya Cape Verde, Vozinha yavuze ko nyuma y'Igikombe cy'Isi nta buzima bwite akigira, ubu yicuza kuba icyamamare.

Uyu munyezamu ni umwe mu bantu Igikombe cy'Isi cyahinduriye ubuzima mu bijyanye no kwamamara, yagezemo atazwi ariko ibyo yakoreyemo byatumye izina rye rizamuka cyane.

Vozinha Igikombe cy'Isi cya 2026 cyatangiye akurikirwa n'abantu ibihumbi 30, gusa iki gikombe cyabereye muri Leta Zunze Ubumwe za Amerika, Mexico na Canada cyarangiye akurikirwa na miliyoni 29.

Yavuze ko ubu nta buzima bwite akigira, asigaye abayeho yigengesereye, ibintu ahamya ko bimubangamiye.

Ati "Nabuze amahoro n'umutuzo. Ntabwo nkigira ubuzima bwanjye bwite, byibuze ngo binamere nk'uko byari bimeze mbere. Iyo ngiye ahantu nko gufata amafungurio, ntihabura uza ansanga ashaka ifoto cyangwa ‘autograph', bikaba bibi hari n'abandi bari kumfata amashusho.”

Yakomeje avuga ko atazi icyo yakora ngo bihagarare, gusa ngo nubwo abantu bihutira ubwamamare kuri se ari ibishoboka uwamuhitishamo gusubira uko yari ameze, yabyemera atajuyaje.

Ati “Ibi ni ko byagenze mu buzima bwanjye, kandi sinzi icyo nakora kugeza ubu kugira ngo mbihagarike. Abantu benshi birukira ubwamamare no kuvugwa mu bitangazamakuru, ariko akenshi bareba gusa uruhande rwiza. Mu by'ukuri uwampitishamo kubaho ubuzima mbayeho ubu no kubaho ubwo nahozemo, nahitamo ubwo nari mbayeho mbere.”

Cape Verde izakira u Rwanda ejo mu mukino w'umunsi wa kabiri mu itsinda K mu gushaka itike y'Igikombe cya Afurika cya 2027.

Vozinha yavuze ko atakibayeho ubuzima bwe busanzwe