Amagambo akomeye ya Iryn Namubiru ku wamurokoye impanuka y’ubwato
Umuririmbyi Iryn Namubiru ukomeye muri Uganda yavuze amagambo akomeye mu gushimira umuyeshuri wamurokoye mu mpanuka y’ubwato iherutse kuba mu Kiyaga cya Victoria igahitana abarenga 30 mu ijoro ryo ku wa 25 Ugushyingo 2018.
Ubu bwato, bwavaga ku kirwa cya Mutima bwerekeza ahitwa Motola Beach ahari hagiye kubera ibirori byo kubyina no kwishimishiriza ku nkombe z’ikiyaga byari byateguwe n’abarimo Umunyarwanda Sandra Teta.
Mu bandi bantu bakomeye bamenyekanye ko barokokeye muri ubu bwato, harimo Igikomangoma David Wasajja usanzwe azwiho gukunda “kurya ubuzima”.
Wasajja yagaragaye mu mashusho yafashwe n’umunyamideli Brian Salvator banywa; babyina banagaragaza ko baryohewe n’ubuzima. Uyu Brian we yahise ashiramo umwuka cyo kimwe n’umunyamafaranga Michael Kaddu wigeze kuvugwaho gukundana na Desire Luzinda mu myaka ishize.
Iryn Namubiru warokotse iyi mpanuka yanditse ubutumwa burebure kuri Instagram ashimira umusore witwa Masole Brian wamurohohoye mu mazi, ashimangira ko ari intwari ye ndetse agaruka ku bihe banyuranyemo mu ijoro impanuka yabereyemo n’uburyo nyuma yaho yakomeje kumugaragariza umutima wa kimuntu.
Ubutumwa Iryn Namubiru yanditse ashimira umusore wamurokoye
Uyu ni Masole Brian umunyeshuri muri KIU wakijije ubuzima bwanjye n’abandi benshi. Yasubiye ku kiyaga inshuro eshatu kugeza ubwo nta bandi bantu bazima bari bahasigaye.
Brian n’abandi banyeshuri bagenzi be bari bishyuwe ngo ubwato bwabo bukoreshwe mu kwishimisha ku birwa byegeranye n’aho. Bakimara kubona ubwato bwacu butangiye kurohama, yahise afata inshuti ze bihuta baza kudukiza.
Yumvise nsakuza cyane nsaba ubufasha ubwo nari mbonye ubwato bundi buduca i ruhande, yabonye urumuri rwa telefone yanjye nari nakomeje kuzunguza ahita aza ansanga. Yansabye kumuha telefone, igikapu ahita ankururira mu bwato bwe, hanyuma agerageza gukurura undi mukobwa wari waje afata ukuboko kwanjye ubwo ikote rituma umuntu atarohama ryari hafi kuturekura.
Nabashije kumukurura mugeza hejuru ku bwato ariko ahita yitaba Imana ako kanya kuko igice cyikote rye cyo cyari cyafashwe munsi y’ubwato aremeye cyane. Uwo yari umugore wa Bisase nyiri ubwato. Telefone yanjye nahise nyisigira Brian hanyuma njya gukangura Shylla Nankunda wari kuba yapfiriye mu bwato.
Warakoze Brian, abarobyi, abaturage n’abandi bose twafatanyije gutabara abantu. Birababaje ko umurobyi umwe yapfuye kugira ngo abandi babeho. Aruhukire mu mahoro.
Muri ririya joro Brian yahamagaye abanjye nyuma yo kumenya uwo ndi we ababwira ko ndi muzima nta kibazo mfite. Ahagana saa 03:30 yazanjye iwanjye n’umujyanama wanjye ngo barebe uko merewe. Ejo, ku wa Mbere tariki 26 Ugushyingo 2018, Brian yagarutse mu rugo, anzaniye inkweto na telefone yanjye.
Twafashe iyi foto.
Uri intwari yanjye.
Nanone, mu Mana hari ugukomera.
Ibitekerezo