Nyampinga w’u Rwanda, Iradukunda Liliane ari mu ba mbere bageze mu ngoro ndangamateka y’ikipe ya FC Barcelona yubatswe muri Haikou mu Bushinwa.

Ku rubuga rwa FC Barcelona, hasohotse inkuru ishimangira ko iyi ngoro yiswe ‘Barça Experience’ imaze igihe yubakwa, iherereye ku kirwa cya Hainan mu Murwa Mukuru wacyo Haikou.

Hainan, iri mu duce dusurwa cyane mu Bushinwa ndetse kuri ubu hari kubera iserukiramuco mpuzamahanga ry’ubukerarugendo ‘Hainan International Tourism Island Carnival Promotion’ ku nshuro ya 19.

‘Barça Experience’, igomba gufungurwa ku mugaragaro kuri iki Cyumweru tariki ya 25 Ugushyingo 2018.

Mbere y’uko iyi ngoro ndangamurage ya FC Barcelona itahwa, abakobwa bahataniye ikamba rya Nyampinga w’Isi barimo na Iradukunda Liliane, bayitembereye mu ba mbere ndetse basangizwa amateka yimbitse y’iyi kipe.

Uyu ni umushinga mugari iyi kipe yakoze ifatanyije n’ikigo Mission Hills Group. Ubumbiye hamwe, ingoro ndangamateka, ububiko bw’imyambaro mishya n’iya kera y’iyi kipe, igice cyagenewe ibikombe ikipe yatwaye, ikibuga cyo gukiniraho n’ibindi.

Mu gutangiza Barca Experience, hari abayobozi bakuru barimo ukuriye uyu mushinga Didac Lee, Umuyobozi Mukuru wa FC Barcelona Òscar Grau, Umunyamabanga ushinzwe ibya tekinike Eric Abidal, Juliano Belletti wahoze akinira iyi kipe n’abandi bayobozi batandukanye.

Aba bose basuye iyi ngoro banyurwa n’ibyakozwe mu gihe gishize kuva umushinga wakwemezwa n’Inama idasanzwe y’abanyamuryango b’ikipe mu 2016.

Mu byo Iradukunda Liliane na bagenzi be bahataniye Miss World bishimiye kurusha ibindi, ni igice kiri muri iyi ngoro gikoze mu buryo bw’ikoranabuhanga ridasanzwe ku buryo bagutereka muri Camp Nou kandi wibereye mu Bushinwa.

Nyampinga Iradukunda Liliane na bagenzi be bari mu ba mbere baganuye iyi ngoro

Uretse iyi ngoro abakobwa batashye, bagomba no kwitabira iserukiramuco ry’ubukerarugendo riri kubera muri Hainan. Kuri uyu wa Gatandatu, barangajwe imbere na Miss World 2018, Manushi Chhillar biyerekanye buri wese mu mwambaro gakondo w’igihugu cye.

Miss Iradukunda Liliane[uwa kabiri ku murongo wa kabiri], mu gikorwa cyo gutangiza Barca Experience

Muri iyi ngoro harimo amafoto n'amashusho y'ibihe by'amateka FC Barcelona yagize

Abakobwa batambagijwe iyi ngoro yubatse ku buso bungana na meterokare 4000

Mu byumba byose by'iyi ngoro harimo amashusho yerekana ibigwi by'iyi kipe

Mu bakobwa bahataniye Miss World harimo abakunda FC Barcelona

Igice cyahariwe ibikombe ikipe yatwaye

Murakaza neza muri Kigali Arena

)