Rayon Sports yerekeje muri ½ cy’irangiza cya CECAFA Kagame Cup 2026 iyoboye itsinda nyuma yo gutsinda Al Hilal SC yo muri Sudani igitego 1-0, mu mukino wabereye kuri Stade Amahoro ku mugoroba wo kuri uyu wa Gatandatu.
Ikipe ya Rayon Sports yatangiye umukino ifite inyota yo kubona amanota atatu, ndetse yahise itangira gusatira izamu rya Al Hilal kuva ku munota wa mbere. Elie Tatou, Issa Djiguiba na Kameni Junior bagaragaje ubufatanye bwahoraga butera impungenge ubwugarizi bw’iyi kipe yo muri Sudani.
Ku munota wa 16, Antonio Atisso Kodjo Kossivi yafunguye amazamu atsindira Rayon Sports igitego rukumbi cyabonetse muri uyu mukino. Yakiriye umupira mwiza wari uturutse kuri kapiteni yatewe Nshimiyimana Emmanuel "Kabange", awushyira mu izamu neza, bituma abafana ba Gikundiro bazamura ibyishimo muri Stade Amahoro.
Nyuma y’icyo gitego, Al Hilal SC yagerageje gushaka uko yakwishyura, ariko ba myugariro ba Rayon Sports bakomeza guhagarara neza. Umunyezamu Dande Junior na we yitwaye neza, akuramo imipira ishobora kuvamo ibitego, harimo uburyo bukomeye bwa Emmanuel Flomo mu gice cya kabiri.
Rayon Sports na yo yakomeje kurema uburyo bwo gutsinda ibindi bitego, ariko Elie Tatou na Ganijuru Ishimwe Elie bananirwa kububyaza umusaruro, umunyezamu Farid Ouedraogo akomeza kurokora ikipe ye.
Umutoza Francis Christian Haringingo yakoze impinduka zirimo kwinjiza mu kibuga Tambwe Gloire, Ndayishimiye Didier na Nizeyimana Mubaraka kugira ngo arusheho gukomeza ikipe ye mu minota ya nyuma.
Nyuma y’iminota 90 n’itanu y’inyongera, umukino warangiye Rayon Sports itsinze igitego 1-0, ihita ibona itike yo gukomeza muri ½ cy’irangiza cya CECAFA Kagame Cup 2026.
Mu wundi mukino usoza imikino y’amatsinda waberaga kuri Kigali Pele Stadium , Tusker ya Jullien Mette yatsinze ibitego 2-0 KVZ yo muri Tanzania.
Ibitekerezo