Gisagara VC na APR zegukanye ibikombe, intsinzi ya REG na RRA ntiyagira icyo izimarira (AMAFOTO)
Irushanwa rya Forzza Volleyball Tournament ryari rimaze iminsi riba, ryaraye risojwe aho Gisagara VC mu bagabo yaryegukanye n’aho mu bagore ryegukanwa na APR WVC, ni amakipe yose yatsindiwe ku mukino wa nyuma w’agace ka 5.
Muri rusange hakinwe uduce 5 mu byiciro byombi, itegeko ryavugaga ko ikipe izegukana uduce twinshi ari yo izaba yegukanye iri rushanwa, amakipe yanganya umubare w’uduce yegukanye hakarebwa irusha indi amanota.
Uduce 4 twabanje, tubiri twabereye i Kigali utundi tubiri tubera i Gisagara, mu mpera z’icyumweru gishize hakaba harakinwaga agace ka gatanu ari nako ka nyuma kari kagize iri rushanwa.
Nyuma y’imikino y’amajonjora, ejo ku Cyumweru tariki ya 6 Gashyantare hakinwe imikino ya ½, mu bagore APR WVC yahuye na IPRC Kigali iyitsinda amaseti 3-0 (25-16, 25-20 na 25-13), RRA ikaba yaratsinze UVC amaseti 3-2 (19-25, 26-24, 25-17, 12-25 na 12-15).
RRA yaje gukomeza kwitwara neza aho yaje no kwegukana aka gace itsinze APR WVC amaseti 3-1 (25-23, 25-15, 23-25 na 25-18).
Nubwo yegukanye aka gace igikombe cyaje kwegukanwa na APR WVC yegukanye uduce tubiri inganya na UVC WVC nayo yegukanye tubiri ariko APR ikaba yayirushaga amanota, umwanya wa 3 wegukanywe na RRA yegukanye agace kamwe.
Mu bagabo imikino ya ½ REG yatsinze amaseti 3-0 Kirehe (25-18, 25-23 na 25-16) ni mu gihe Gisagara yatsinze UVC VC amaseti 3-2.
Gisagara yari yamaze kwegukana iri rushanwa kuko mu duce 5 yari ifitemo 3, yaje guhurira ku mukino wa nyuma na REG yari ifite kamwe, REG yaje gutsinda Gisigara amaseti 3-1 (26-24, 16-25, 24-26 na 17-25), yahise iba iya 2 kuko yegukanye uduce 2 ni mu gihe UVC VC yabaye iya 3.
Muri buri cyiciro ikipe ya 3 yahawe miliyoni y’amafaranga y’u Rwanda, iya kabiri ihabwa miliyoni n’igice mu gihe iya mbere yahawe miliyoni 2.
Mu bakinnyi bitwaye neza, mu bagore Mukandayisenga Benitha wa UVC WVC ni we wahembwe nk’umukinnyi wahize abandi ni mu gihe mu bagabo yabaye Malinga Kathbart wa Gisagara VC.
Ibitekerezo