Dr Byamungu wari Umuyobozi ushinzwe ishoramari muri Banki y’Igihugu y’Iterambere (BRD) n’abagize umuryango we bagera kuri bane bahitanywe n’impanuka ahitwa Lwengo ku muhanda uva Masaka werekeza Mbarara, mu ijoro ryo ku wa 30 Ukuboza 2018.

Nyuma y’inkuru y’incamugongo y’impanuka iherutse kubera muri Uganda ikagwamo Dr Byamungu Livingstone n’abana be bane, basezeweho mu cyubahiro kuri uyu wa Gatandatu, tariki ya 12 Mutarama 2019.

Mu gusoza uyu muhango, umugore wa Dr. Byamungu wabashije kurokoka iyi mpanuka yatanze ubuhamya bukomeye ashimira ko yamubereye umugabo mwiza mu myaka 19 bamaranye.

Mukagatare Dorcus, umugore wa Dr. Byamungu yarokokanye n’umushoferi nubwo bombi bafite ibikomere bikomeye ndetse no mu muhango wo kubasezeraho umugore yagenderaga mu kagare.

Yagize ati "Dr [Byamungu] warakoze kumbera umugabo mwiza, twari tugiye kumara imyaka 20. Yakoze ibishoboka byose nk’umugabo mu rugo yakunze abana, arankunda, aramfasha ndiga ndarangiza. Ntacyo namubwira, ntan’icyo navuga ko atakoze. Uwiteka wenyine amumpere iruhuko ridashira."

Mukagatare yavuze ko kumenya Imana ari byo byamushoboje kwiyakira nyuma yo kubura abana be batanu na Se ubabyara mu mwaka umwe. Uyu muryango mu mezi ashize wapfushije umukobwa wari imfura yabo witwaga Uwase Charity ku wa 8 Werurwe 2018.

Yakomeje ati “Imana yashoboye kunsiga mu byo yansigiye ni ukugira ngo nzabashimire nzabane, namwe mu gihe Dr (Byamungu) adahari, Ngabo adahari, Charity adahari, Nziza adahari, Manzi adahari, Bless adahari […] Ntabwo nakwifuje kuba mpari aba bantu bose mvuze batari hano uyu munsi, ariko imigambi y’Uwiteka itandukanye n’iy’abana b’abantu.”

Yanagarutse ku bana be na Dr. Byamungu ati “Nari mfite abana beza ntabwo ari ukwivugira abana, ariko bakundaga Imana, bagakunda abantu, bakundaga kwiga. Manzi yari umuhungu uceceka cyane, ukunda kwiga, buri gihe namubwiraga ko azaba umunyapolitiki mwiza. Mu ijuru nziko Uwiteka afite abahanga benshi uhereye kuri Se.”

Mu bandi batanze ubuhamya harimo umuvandimwe wa Dr. Byamungu, Se wabo wamureze, Sebukwe ndetse na Uwera Ruth uvukana na Mukagatare. Amasengesho yo gusabira Dr. Byamungu n’abana be yayobowe n’Umushumba mu Itorero ry’Abangilikani mu Rwanda, Paruwasi ya Mutagatifu Petero iri i Remera, Rev Dr Antoine Rutayisire.

Dr. Byamungu n'abana be basezeweho mu cyubahiro

Dr. Byamungu yari umuyobozi ushinzwe ishoramari muri banki itsura amajyambere BRD. Kuva muri 2001 kugeza 2007 yabaye umuyobozi mu mashami atandukanye muri iyi banki haba ubwishingizi mu buhinzi, ubwishingizi ku nyubako ndetse n’ubwishingizi ku amashuri.

We n’abana be, baherekejwe n’abantu benshi barimo inshuti, imiryango, abakoranye na Dr. Byamungu, abaturutse muri Uganda, abihayimana bo mu muryango yabarizwagamo, n’abayobozi barimo Minisitiri w’Ubutabera akaba n’intumwa Nkuru ya Leta, Busingye Johnston; Guverineri wungirije wa Banki Nkuru y’Igihugu (BNR), Dr. Monique Nsanzabaganwa ndetse n’abandi.

Ku maso, yari afite intimba n'ikiniga

Mukagatare Dorcus warokotse impanuka yaguyemo umugabo we n'abana be bane yari afite umubabaro cyane mu kubasezeraho

Yagenderaga mu kagare

Yatanze ubuhamya bw'uko umugabo we yamubaniye neza

Yagenderaga mu kagare

Umugore wa Dr. Byamungu afite ibikomere

Dr. Byamungu n'abana be baguye mu mpanuka bashyinguwe i Rusororo ku mugoroba

)