Uwamahoro Angel, ari mu bakinnyi b’imena bazagaragara muri filime yakinwe ku gitabo ‘Notre-Dame du Nil’ cya Mukasonga Scholastique, umwanditsi ukomeye uba mu Bufaransa.

Ubusanzwe, Angel Uwamahoro[Malaika Uwamahoro] ni umuhanzi uzwi ubuhanga bukomeye mu kwandika no kuvuga imivugo akaba umukinnyi w’amakinamico.

Mbere ya filime ‘Notre-Dame du Nil’, Angel Uwamahoro yanakinnye mu ikinamico ‘Our Lady of Kibeho’ yakozwe na Katori Hall, iyi yerekanwe i New York n’ahandi. Angel Uwamahoro yakinnye ari umwe mu bakobwa babonekewe na Bikira Mariya.

Ikinyamakuru Ecran Noir, cyatangaje ko filime ‘Notre-Dame du Nil’ yakorewe mu Rwanda, mu Karere ka Musanze na Rutsiro. Yayobowe n’umwanditsi akaba n’umuhanga muri sinema, Atiq Rahimi, yamaze ibyumweru birindwi guhera ku wa 22 Ukwakira 2018.

Iyi filime yakozwe hashingiwe ku gitabo ‘Notre-Dame du Nil’ cya Mukasonga uba mu Bufaransa, uyu yahunze kuva mu 1973. Iki gitabo yagishyize hanze mu 2012 ndetse gihabwa ibihembo bikomeye birimo icyitiriwe Renaudot.

Mu kuvuga "Notre-Dame du Nil" yashakaga kugereranya u Rwanda nk’umukobwa w’isugi w’umwirabura, wagenewe isura n’umukoloni w’Umubiligi aherereye mu misozi y’u Rwanda ku isoko ya Nil.

Muri iyi filime bazakinamo ubutumwa bugaruka ku banyeshuri b’abakobwa baba biga mu ishuri gatolika rya Notre-Dame du Nil, riba riri ahantu ku musozi. Aba bakobwa baba bigana umwete baharanira kuzaba abantu bakomeye mu gihugu ariko bamwe bagatsikamirwa kubera amateka mabi.

Uburyo inkuru ya filime ishushanyije, byanditswe na Atiq Rahimi afatanyije na Ramata Sy (uyu yagize uruhare mu kwandika film Sibel yahawe igihembo FIPRESCI i Locarno ).

Mu bazayitunganya harimo ikigo Les films du Tambour na Chapter 2 kiyobowe na Dimitri Rassam; ku bufatanye na France 2 Cinéma, Swoon Productions na Belga productions. Iyi filime izakwirakwizwa na Bac Films.

Aba ni bamwe mu bakinnyi bazagaragara muri filime 'Notre-Dame du Nil'

Mu bakinnyi bazayigaragaramo, harimo Amanda Mugabekazi, Albina Kirenga, Malaika Uwamahoro, Clariella Bizimana, Belinda Rubango na Pascal Greggory.

Filime 'Notre-Dame du Nil', ikinwa mu gushushanya inkuru y'abakobwa biga mu ishuri gatolika baba bahuje inzozi zo kuzaba abantu bakomeye

Iyi filime yakiniwe mu duce twa Musanze na Rutsiro

Malaika Uwamahoro asanzwe ari umuhanga mu buhanzi bw'imivugo no gukina ikinamico

)