Itsinda rizwi nka Group Amababa ribarizwa mu itorero ry’Abadivantisite b’umunsi wa Karindwi, rigiye kumurika umuzingo wa mbere w’amashusho, mu gitaramo giteganyijwe ku wa 17 Gashyantare 2019.

Imurikwa ry’iyi album y’amashusho rizabera ku rusengero rw’Abadiventisite i Nyamirambo ahazwi nko kuri Horebu. Ni mu gitaramo cyatumiwemo amatsinda y’abaririmbyi akunzwe muri iri torero.

Groupe Amababa ubusanzwe ibarizwa mu itorero ry’Abadiventisite i Nyamirambo, munsi ya Stade yatangiye umurimo wo kuririmba zo kuramya no guhimba Imana mu mwaka wa 2007.

Kuva icyo gihe kugeza ubu, ikaba yaragiye ikora ibikorwa bitandukanye by’iyogezabutumwa hirya no hino binyuze mu mavuna ndetse n’ibindi bitaramo bitandukanye bigamije kwagura ivugabutumwa.

Kuri ubu iri tsinda rigiye kumurika album ya mbere y’amashusho mu gitaramo batumiyemo amatsinda atandukanye.

Ayo matsinda akaba arimo korali Abatwaramucyo ibarizwa mu itorero rya Kacyiru, Ababimbuzi ya Muhima, Abahamya ya Muhima ndetse na Babwire Yesu y’i Samuduha.

Amababa mu marenga ya gihanuzi asobanura "Kwihuta", iyi ikaba ari nayo ntego ya Groupe Amababa nk’uko babisobanura ko muri Matayo 28:19-20 havuga kwihutana ubutumwa bwamamaza Yesu Kristo aho bashoboye hose kuva batangira umurimo wo kuririmba mu mwaka wa 2007.

Groupe Amababa yatangiranye n’abasore barindwi. Nubwo abayitangiriyemo bose batakiyirimo, kugeza ubu iri tsinda, rimaze gucamo abaririmbyi bagera kuri 19.

Ubuyobozi bw’iri tsinda buvuga ko mu kwihutana ubwo butumwa bwiza, bamaze kuzenguruka uturere tw’u Rwanda hafi ya twose kandi bakishimirwa n’abo basanze ndetse bakanabwirwa ko indirimbo zabo zifasha benshi haba ku bazitunze, abazumva kuri Radiyo cyangwa ku mbuga nkoranyambaga nka YouTube na Facebook.

Groupe Amababa ifite album eshatu z’indirimbo z’amajwi adafite amashusho ndetse ikaba ifite n’izindi ndirimbo bitegura kuzashyira kuri album ya kane.

Kugeza ubu icyo iri tsinda ryimirije imbere ni igitaramo cyo gushyira ahagaragara umuzingo wabo wa mbere w’indirimbo z’amashusho (DVD). Igikorwa giteganijwe ku wa 17 Gashyantare 2019, ku rusengero rwa Horebu, i Nyamirambo.

Iki gitaramo kikazabera ku rusengero iyi groupe ibarizwaho rwa Horeb i Nyamirambo, munsi gato ya Stade Regionale guhera i saa sita z’amanywa.

Umva hano indirimbo “Ngiye Kuzaririmbira Mu Ijuru” Groupe Amababa

)