Korali Bethlehem ibarizwa mu itorero rya ADEPR Rubavu yongeye gutegura icyumweru cyahariwe ivugabutumwa cyiswe ‘Bethlehem Evangelical Week’ kizashimangira umuhamagaro wayo mu murimo binyuze mu ndirimo.

Ni igikorwa giteganijwe kuva tariki ya tariki ya 17 kugeza ku wa 23 Ukuboza 2018, kikazakorerwamo ibikorwa by’urukundo bizatwara asaga miliyoni enye n’igice.

Ni ku nshuro ya kane Korali Bethlehem ibarizwa mu itorero rya ADEPR Rubavu igiye gukora iki giterane ngarukamwaka. Ni igiterane cyagutse kimara icyumweru kiba.

Igiterane cy’uyu mwaka cyatumiwemo abahanzi bakunzwe cyane mu ndirimbo zo kuramya no guhimbaza Imana barimo Papi Clever, Simon Kabera, Deo Munyakazi, Citamu Nakuru Praise Worship Team ndetse na Gisele Precious.

Pastor Munongo Stephano ni we uzigisha ijambo ry’Imana rizagaruka ku nsanganyatsiko yagenewe iki giterane iboneka muri 1 Samweli;7;12 havuga ngo “Uwiteka yaratuzahuye kugeza n’ubu.”

Aganira n’ikinyamakuru ISIMBI, Umuyobozi wa Korali Bethlehem, Muhire Innocent, yatangaje ko ‘Bethlehem Evangelical Week’ y’uyu mwaka wa 2018 izaberamo ibikorwa by’urukundo birimo; kuremera abatishoboye, gusura abagororwa, kwishyura ubwisungane mu kwivuza n’ibindi.

Ati,”Ni ibikorwa bizatwara agera kuri miliyoni enye n’igice z’amanyarwanda (4,500,000Frw). Kandi inkunga ya buri wese ikaba ikenewe.”

Uyu muyobozi akomeza avuga ko Bethlehem Week izaba ari umuriro, hazakorwamo ibikorwa bitandukanye, ahazasurwa Gereza ya Musanze irimo abana n’abagore, kuremera abatishoboye babiri, kwishyurira Mutuelle imiryango icumi, gusura ibitaro bya Gisenyi ndetse hanakirwe abashyitsi barenga 300.

Korali Bethlehem y'i Rubavu yateguye icyumweru cy'ivugabutumwa kizashimangira umuhamagaro wayo

Korali Bethrehem, imwe mu zikunzwe cyane muri ADEPR, ibarizwa mu itorero rya ADEPR Gisenyi, Intara y’Uburengerazuba mu Karere ka Rubavu ikaba yaratangiye ivugabutumwa mu 1965 icyo gihe yitwaga iya Gisenyi.

Imaze imyaka igera kuri 52 mu murimo w’ivugabutumwa. Bamwe mu bayitangije icyo gihe n’abayiririmbyemo bamwe ntibakiriho abandi bafite imirimo itandukanye. Iyi korali imaze kugira albums esheshatu z’indirimbo z’amajwi ndetse zimwe muri izi zifite n’amashusho yazo.

Korali Bethlehem ikaba igizwe n’abaririmbyi 90 baboneka ndetse n’abandi baririmbyi batakibarizwa muri Korali igihe cyose kubera impamvu zitandukanye nko kwimuka, akazi n’izindi.

Imaze gukora ivugabutumwa mu bihugu bitandukanye birimo u Burundi, R.D.Congo, Uganda, Kenya ndetse ikaba iri no kwitegura kuzerekeza muri Afurika y’Epfo.

)