Rayon Sports yatangaje ko yasinyishije Elie ‘Eldhino’ Mokono, umukinnyi ukina hagati mu kibuga ukomoka mu Burundi, mu rwego rwo gukomeza kongera imbaraga mu ikipe nyuma yo kwegukana Igikombe cya CECAFA Kagame Cup 2026.
Iyi kipe ibinyujije ku mbuga nkoranyambaga zayo ku mugoroba wo kuri uyu wa Gatanu, yatangaje ko Mokono ari umwe mu bakinnyi bashya bagiye kuyifasha mu rugendo rwo guhatanira ibikombe bitandukanye mu Rwanda no ku rwego mpuzamahanga.
Mokono w’imyaka 26 y’amavuko, yavutse ku wa 23 Gashyantare 1994. Asanzwe ahamagarwa mu Ikipe y’Igihugu y’u Burundi, Intamba mu Rugamba, ndetse afite ubunararibonye bwo gukina imikino yo ku rwego mpuzamahanga.
Mbere yo kwerekeza muri Rayon Sports, Mokono yari asanzwe akinira Fountain Gate FC yo muri Tanzania, ikipe yari isanzwe ikina mu cyiciro cya mbere muri icyo gihugu. Ni ho yagaragaje ubushobozi bwo gufasha ikipe ye hagati mu kibuga, harimo no kubona ibitego.
Amakuru atangwa n’ibitangazamakuru byo mu Burundi avuga ko uyu mukinnyi yaba yasinyiye Rayon Sports amasezerano y’umwaka umwe.
Kuri ubu, Mokono aje muri Rayon Sports mu gihe iyi kipe ikomeje kubaka itsinda rishya rishobora guhangana mu marushanwa yo mu Rwanda ndetse n’ayo ku rwego rw’akarere.
Rayon Sports yatangaje ko kwakira uyu mukinnyi bizaba nka kimwe mu bikorwa byayo byo gutangiza ibyo yise “Champions Month”, nyuma yo kwegukana CECAFA Kagame Cup 2026.
Ibitekerezo