Umuhanzikazi wo muri Uganda, Spice Diana, yemeje ku mugaragaro ko yatandukanye burundu n’umujyanama we, Roger Lubega, ndetse n’inzu y’umuziki ya Source Management bakoranaga.
Ibi yabitangaje abinyujije ku mbuga nkoranyambaga ze, ashimangira ko habaye impinduka mu micungire y’umwuga we zatangiye gushyirwa mu bikorwa guhera ako kanya abitangarije.
Mu itangazo rye, Spice Diana yavuze ko ibijyanye n’imikoranire yabo byarangiye mu bwumvikane, harimo no gusaranganya umutungo n’inyungu bari barabonye mu gihe cyose bamaze bakorana.
Yavuze ko impande zombi zafashe inzira zitandukanye, nta kibazo na kimwe kikiri hagati yabo.
Ati “Sinzinjya mu gusebanya, kuvuga ibihuha cyangwa amagambo agoreka ukuri. Amakuru yose atatanzwe binyuze ku mbuga zanjye zemewe afatwa nk’atemewe. Ukoresheje izina ryanjye, isura cyangwa ikirango cyanjye nabi azabihanirwa binyuze mu mategeko.”
Spice Diana kandi yatangaje ko agiye gukomeza umwuga we afashijwe n’ubuyobozi bushya buzajya bumucungira ibikorwa byose by’ubucuruzi, harimo gutegura ibitaramo, amasezerano y’ubucuruzi n’itumanaho ryose rimureba ku rwego rw’umwuga.
Uyu muhanzikazi yashimiye Roger Lubega ku ruhare rukomeye yagize mu iterambere rye mu muziki mu myaka hafi icumi bamaze bakorana, avuga ko yamubereye inkingi ya mwamba mu rugendo rwe rwo kuba umwe mu bahanzi bakomeye muri Uganda.
Nubwo bari bamaze amezi menshi bivugwa ko batandukanye, Spice Diana yari yabiciriye inkeri bwa mbere mu kiganiro yagiranye na radiyo NRG, aho yavuze ko amaze hafi umwaka asa nkaho adakorana na Roger.
Gusa nabwo icyo gihe yongeyeho ko nta mwuka mubi uri hagati yabo, kuko bakiri mu mibanire myiza kandi bavugana igihe bibaye ngombwa.Yahumurije abafana be abizeza ko umwuga we uhagaze neza, anatangaza ko afite itsinda rishya rimufasha, riri mu bo basanzwe bakorana na mbere, n’igihe Roger yari akiri umujyanama we.
Ibitekerezo